الدايرة المقطوعة

إذا مش نازلين للناس ف بلاش والزم بيتك بيتك .. بيتك وابلع صوتك وافتكر اليوم ده لإنه تاريخ موتي وموتك ... إذا مش نازلين للناس ف بلاش ما دام الدايره ماكاملاش والحاجه ما تاماش واصحاب الحاجه ما عارفاش إيه المعنى وأى بطولة فإن حياتنا وأحلى سنيننا يروحوا بلاش ؟ حاجة ما راكباش @ @ @ الله يعين بيت الفكر وبيت اليوم اللي ورأنا الفكر لأن الفكر كتاب " وعويضه " حياته تراب وهباب عايش زمنه الكداب زي العادة مرتاب كنكة على دمس ونفس مقطوع في الغاب ماشبعناش عنه بعد وهوه ماشبعش غياب . @ @ @ وأقولك إيه اللى قطع الدايره ياأمير وخلى مابين النبي والخلق الغربة وتقطيع المشاوير .؟ إن انا وانت بنلعب طول العمر دورين طليعة وجماهير. وعويضة بينفخ موت الدمس والعالم نمس العالم سرقة وقلع ولبس وعويضة بقلبه الجبس إللي معلمه إمتى ما يحسش وامتى يحس .. بيعدى الأيام جمل المراحيل زى ماعداها من أول ما اتخرط الكون من أول ماطلع للدنيا ووجد قبله فرعون. @ @ @ نفس الأيام نفس النسخة مطبوعة على كل الأغوام. ماسمعشي بينا ماسمعناش ماقابلناش . . . ما اتكلمناش . ولأن حمول الأيام مش مرفوعة إذا يد عويضة ما ترفعهاش. والقولة الحقة مش حقه اذا صدر عويضة ماطلعهاش والخطوة حتفضل مشلولة إذا قدامنا عويضة ما خطاش . ولإن دي حاجه . عويضة لسه ما يدركهاش ولا يدركناش ولا يعرفناش.