بوح الخـاطر

صار استاذ..!! بعد ما كان بأيدينا صار يتغلى علينا صار (استاذ) واحنا اللي علمناه يمسك قلم واحنا اللي انتشلناه من حفرة ألم الله عليك يازمن دوم هالطيب يدفع الثمن..!! * * * عطيناه لما كانت الدنيا معانا وكسيناه لما كان يذوب في هوانا ولما اعترفنا له صرنا (واحد) من هالناس جفا.. ويقابلنا بلا احساس لعبة حب ما فهمناها وغلطة عمر ارتكبناها نعطي القلب للي بايعنا ونغض الطرف عن اللي شارينا ونعيش (دموع).. ونطفي (شموع) ونبحر في سفينة شراعها قهر وموانيها خطر وتبقى الجروح زخات مطر..!! * * * في الحب اسرار ومحاكم والجاني مجني عليه والمجرم اسم الله عليه والعواطف هي القاضي وقفص الاتهام (فاضي) هكذا الحياة (الهوى غلاب) في لعبة الأحباب..!! * * * نتوب ونعود.. ونقرر وللرجوع قصة في دنيا العشق غصة نعطي بلا حدود وعنوان حبايبنا الجحود ونتوب ونعود.. وكل مرة نقرر ونتفاجأ بتحول والهزيمة درب طويل نقفز لكن الأرض مكان يسموها لعبة زمان * * * الصبر.. جمر والتنازل هزيمة وما بين الجمر والصبر رحلة طويلة يمكن نهايتها ولع والمحبوب عايش ولع.. لكن السطر الاخير مكتوب بخط عريض قلب انخدع..!! * * * صعبة.. الهزيمة وصعب نسيان الحبيب والكرامة رأس مال قصر العمر لوطال لكن الأكيد.. ان الغدر جرم شديد وان الخداع حبله قصير هذه الحياة وهذا الزمن والطيب هو اللي يدفع الثمن