موضي شفتي يا سارة.. منيرة خفضت من وزنها 16كيلو وبفترة قياسية
سارة آه يا القهر.. وايش السبب
موضي: يقولون لها مسوية (بصمة الدم)
سارة: حسرتي لو اسوي (بصمات لدمي) موبصمة واحدة ماكو فايدة (هذا سيفوه.. وهذي خلاجينه) حارمة نفسي لذايذ الدنيا.. وبعد.. ماكوفايدة.
موضي: طيب سوي مثل (حصة) خففت اكلها وطاح من وزنها (10) كيلو في شهر ونص.
سارة: اخ يا موضي هذي عاد لو ماتأكل يم خفت (5) كيلو حظها في الرجيم (يفلق الصخر). موضي:سارة قولي ما شاء الله على الحرمة ليجيهاشي
سارة: لا .. لا تخافين علهيا هذي ما يجيها شي. هذي يسيح شحمها لو ما تشرب ماي
موضي: الله يكفيها شرك ( ياسارة) الا أبسألك انت ايش نظام اكلك اليومي
سارة ابدا والله .. ما آكل شي يا موضي اذا اصبحت الصبح فكيت ريقي بسندويشتين بيض ما فيهم ولا اضافة غير ما يونيز وشوية بطاطس مقليه و(ادفهم) بكوب شاهي بالحليب وعاد اخويتك تحب السكر علشان كذا اخليه حالي شويه.
موضي: والغداء ايش تأكلين فيه
سارة:لا باقي الفطور الساعة 9 ونصف اسوي ياطويلة العمر شوية (كبدة حاشي) مسبكة على (كيف كيفك) مع البصل والفلفل الاخضر مقلبة بالسمن اللي انت خابرته (توصاية من النعيرية) مع خبز تميس واخذه (عادي) موبا لسمن .. علشان (الرجيم) اللي ذابحني وعاد اصوم بعدها.
موضي: ما شاء الله لآخر اليوم
سارة: حرام عليكم ( ياموضي) تبغيني اموت من الجوع (ناقصة عمر) لازم اتغدا (كبسة) عاد لحم ولا دجاج.. ما تفرق عندي.. المهم.. لين حطيتها على السفرة وطبقت اللقمة من الصحن بيدي ساح الدهن من بين اصابيعي.. وبعدين (ادفها) بعلبة كولا والحلى اللي يجي (بسبوسة او كنافة) ولا انسى ابدا السلطة علشان (الرجيم) اللي ذابحني وعاد اصوم بعدها..
شاهي.. وما يحلي الا ومعاه شوية مكسرات عاد على حسب المزاج فصفص او لوز او جوز.. فستق والا كازو.. حرام عليك يا موضي.. شهيتني على الاكل
موضي: حرام عليك انت يا (سارة) طيب وايش آخر بضايع اسواق معدتك
سارة: قولي ما شا الله يا (موضي) اللي سامعك يقول اني ماكله ذبيحة
موضي: ياحرام ماكلتي حاجة.. الله يساعدك؟
سارة: ايه والله يا (موضي) حتى العشاء آكله خفايف فول وعدس مع كيسه خبز صغير وكوبين شاهي بالحليب.. او معجنات جبنة ولبنة ومناقيش زعترمع علبتين كولا (دايت) شفتي ما اشرب الا (دايت) على بالك اني آكل وبس..
(والله) اني ذابحة نفسي من الجوع.. بس ما ني عارفة من وين كل هالشحم وهاللحم جايني (ثم تستطرد قائلة) اقول (موضي)!!!
موضي: يا نعم ياسارة
سارة: انت الحين.. طايحة فيني من (الصبح) اسئلة وتعليقات!! وانت الجسم اقصد الحال من بعضه!! ليش انت ايش نظام اكلك اليومي؟؟!
موضي: (تتردد وهي محرجة) نفس نظامك يا (سارة) تقريبا.. بس العشاء اخليه جريش..
سارة:؟؟؟!!!
