@ الطريقة مش ضابطه هالايام الرطوبة اعلنت القدوم، والحر على الابواب.. واكيد اللي عنده (قروش) .. على طول باريس او لندن.. وانت يابو العريف على وين رايح؟
- باريس سمعت عنها، ولندن شفتها في التلفاز ، حتى القاهرة زرتها اكثر من مرة ولكن في المسلسلات المصرية لا اكثر.. يعني اخوك حده...!!
@ علينا يابو العريف تراني سمعت انك كل شهر في بلد؟
- قصدك كل يوم في ناد، يوم الاتفاق ويوم القادسية ويوم الخليج، لكن ابو منصور جمع كل هالاندية بالنهضة، وريحنا من ضرب المشاوير وخسارة البنزين..!!
@ اذا انت بتفكر في فلوس البنزين.. يعني ما عمرك بتسافر، وامسح (بوزك) من لندن وباريس وجنيف.
- لندن وباريس اسمع عنهما في الاخبار، بس جنيف من وين جايبها، اكيد اسم لبنان بالانجليزي (جنيف).
@ ابو العريف خلنا نطلع من موضوع السفر، لانك أطرش في الزفة.. بس قل لي.. ممكن السنة الجاية.. نقول ان النهضة غير.. مثل ما قالوا (جدة غير).
- الكتاب يقرأ من عنوانه.. وبصراحة اسماء اعضاء مجلس الادارة (يخوفون وايد) حتى الجيران قالوا ابو منصور (لم) الكل، والظاهر ان نهضة زمان بتعود لكن بموديل 2004م.
@ وخبرنا عن الجار الاتي.. ايش اخباره للعربية؟
- اعتقد ان سالفة الاجانب في الدوري بتكرر هالمرة في العربية، الله يهديهم ما يطلع الاجنبي عندهم اللي بتطلع الروح، وفي النهاية محلك سر..!!
@ أبشرك يابو العريف، يمكن الراشد حل لهم الازمة، تراك ما تدري عن الزياني وربعه هالايام طايحين زيارات في الهوامير.
- على الله يطلعون بشيء.. ترى الزيارات زادت ، ولكن (ماكو) قروش ، لذلك ياولد.. يطلعون الاجانب على قد الحال، لان الفلوس على قد الحال.
