القناعة مع أصحاب الضماير ربيع
... ...والرضا كنز والإيثار نصف إذهبه
والطمايع لأهلها مثل لقمة ضريع
... ...تطعم الجوع لأقبل يوم ذي مسغبه
والصبر يوصل الرجال قدرٍ رفيع
... ...ومايرقّي التقاعس صاحبه مرتبه
ورجل ماله هدف ياجعل ماله شفيع
... ...كن بينه وبين أموات الأنفس شبه ؟
@@@
من لا يحسّب خطوته قبل ممشاه
... ...لا يامن الطيحه ويلعن سببها
مايوجع الرجال لا زلّت خطاه
... ...ياكود شرهة طيبٍ ماحسَبها؟
@@@
إعزفي ترنيمة البعد بأوتار الرحيل
... ...صوت تنهيدة تعب قلبي فبحّة ( نوال )
وإكتبيني ذنب وأقدار وظروف وحصيل
... ...وإرسميني حلم تحقيقه أشبه بالخيال
وإنزعيني نزعة الروح من صدر القتيل
... ...وإركزي عوج النصايب على قبر الوصال
@@@
علمتني معنى الجلاده والإصرار
... ...رغم إختلاف المبتغا والطريقه
وحسّستني خوف الحطب سطوة النار
... ...وفن الحذر قبل إندلاع الحريقه
وضيّعتني في غبّة بحور الاسرار
... ...لين أخلف المحتار وجهة طريقه
ضيعة هل التوراة في شلّة أحبار
... ...وذر الرماده في عيون الحقيقه؟
@@@
يقولون الزمن مظلم وأنا اقول الزمان بخير
... ...مدام الناس في صوت المآذن تسمع الداعي
ومدام الطيب وأهل الطيب تلقى في العرب تقدير
... ...ومدام المرجله يسعى وراها في العرب ساعي
ومدام القرم تدمح زلّته ويحسّه التقصير
... ...إلا من شاف بوجيه النشامى حسرة الناعي
ومدام إن الردي تفضح يدينه رعشة التبرير
... ...وهو خابر معاذير الرخامه مالها داعي؟
@@@
اليوم قلّت في دروبي خطاويك
... ...وأمسٍ على كل الطرق تحتريني
إخذي كلامي لا تغرّك هقاويك
... ...يومك تبيني وكن منتي تبيني
تراي لاقفّلت بمشي وأخليك
... ...وتكفين لاقفّلت لا تتركيني؟
