@@ ويش عندك يا ابو العريف ها الاسبوع؟
ـ عندي حكي وايد عندي سوالف شوق.
@@ والله صرت شاعر؟
ـ لا تغتر فيني الكلام السابق مطلع اغنية.
@@ يعني مثل اغنية البكر في عموده يوم الاربعاء عن الخبر؟
ـ البكر طالع فيها وصاير شكسبير، كتب عن الخبر ونسى الدمام. والله لو يقرأ "مدربنا الوطني" كلامك كان قبل رأسك، دايم يتنافر مع البكر على ان الدمام هي عاصمة الساحل الشرقي.
@@ ومين يفوز فيهم؟
ـ بصراحة المدرب إياه دايم ما يزعل ويقول للبكر أقفل الموضوع.
@@ بس المدرب اليوم مو فاضي للبكر وفكره وعقله في جدة؟
ـ يا ساتر استر!!
@ ليه؟
ـ الاتحا يخوف وايد.
@@ فكرك يسويها أتي الشرقية؟
ـ الطويرقي يقول مو بعيدة.
@@ انت ويش تقول؟
ـ البلوي.. خلي الفرق ترتعد.
@@ يقولون راشد محضر اغنية جديدة للاتفاق لو فاز على الاتحاد؟
ـ وسمعت انا ان عبدالمجيد عبدالله محضر اغنية جديدة للأتي فيها البن البرازيلي وببيتو.
@@ الله هالاثنين حتى في "الكورة" بيتهاوشون؟
ـ الدنيا حظوظ.
@@ هذي اغنية راشد الماجد؟
ـ والله.. صدقني قلتها على الطاير.
@@ خلنا من هالسوالف وقولي ويش اخبا ر النهضة؟
ـ صارت عندهم دراهم وايد "مليونا" ريال سنويا وهم فريق درجة ثانية، واذا ما صعدوا صراحة اللاعبين ما عندهم سالفة.. والرئيس مو مقصر معهم، مكافآت فوز وهم في الدرجة الثانية.
@@ والخليج ويش اخبارهم؟
ـ قالوا صفوا صفين، قالوا احنا اثنين، سلمان المطرود وعبدالله السيهاتي "تيلرميشين" يعني آلة صرف للخليج والباقي ثرثرة ودس السم في العسل، والباقي يتفرج، والنتيجة يقولون انهم بينافسون على جميع الالعاب، ويبون كل البطولات.
@@ وانت ويش تقول لهم؟
ـ مدوا رجلكم على قد الحافكم.
@@ ابسألك.. والا بلاش؟
ـ اكيد عن القادسية.
@ ويش دراك؟
ـ السؤال يقول كذا.
@@ صحيح الادارة تقول ان ما تحقق في مسابقة كأس الامير فيصل بن فهد انجاز؟
ـ لكن بشكل سري.. سري للغاية، والجملة الأخيرة ترى مش البرنامج اللي تعرضه (ذيك القناة) ولكن الادارة قراراتها في الاجتماع الأخير أخذ طابع "سري للغاية".
@ ابو العريف يقولون يد الخليج بعد العز والبطولات يدورون على اداري مو لاقينا؟
ـ الله يهديهم جابوا مرض القلب لهاشم الموسوي وتركهم، وابوهزاع الفذ رافض العودة للجنة والطاسة ضايعة.
