@ ما اسمك؟
- وسومي.
@ هذا اسمك والا الدلع؟
- شفيك هذا اسمي.
@ والكامل؟
- وسمي حمد وسمي.
@ اثنين وسمي ليش؟
- لا كله انا.
@ اي واحد الاول والا الثالث؟
- عمري خمسة.
@ لا اقصد وسمي اسمك والا اسم جدك؟
- جدي اسمه جدي.
@ طيب تروح المدرسة؟
- ايه بروح بكرة.
@ بس انت صغير شلون تروح المدرسة؟
- لا.. مدرسة الصغار مثل (طيوفة).
@ يعني روضة؟
- ايه انا اقول كذا بس (طيوفة) تقول انها مدرسة؟
@ تحب تروح مدرسة اولاد والا بنات؟
- اولاد عشان عيب الولد يدرس مع البنات.
@ يطب من تبي يروح معك المدرسة؟
- اروح مع (طيوفة).
@ بس (طيف) بنت؟
- لا.. هذي طيوفة اللي تلعب معي ولا تضربني.
@ (وسمي) الناس ليش تروح المدرسة؟
- عشان يذاكرون الكتب.
@ وش رأيك بالكتب؟
- اذا زي (طيوفة) حلوة احبها.
@ وين بتروحون بكرة؟
- بروح مع بابا وماما وكل الناس و(طيوفة) لمكة.
@ الناس ليس تروح لمكة دائما؟
- عشان يصلون.
@ وانت تعرف تصلي؟
- ايه.. اقول الله أكبر إذا رحت مع بابا المسجد.
@ يطب لما تكبر وش تبي تصير؟
- ابصير كبير مرة.
@ لا.. يعني تبي تكون دكتورا والا شرطي؟
- دكتور وشرطي.
@ ما يصير تشتغل بالاثنين مع بعض؟
- كيفي انا شاطر في الاسنان واعالج اسنان (طيف) ولا اعطي الصغار ابرة اعطيها الحرامي.
@ واذا اشتغلت شرطي وش تبي تسوي؟
- اصيد الحرامية واوقف السيارات بالشارع افتشها.
@ عندك سيارة؟
- لا ما احبها عندي سيكل.
@ والسيارة ليه ما تحبها؟
- لانها كبيرة وتشتعل نار.
@ واذ كبرت وش تبي تسوق؟
- سيارة زي بابا بروح فيها مكة بكرة.
@ والطيارة ليش ما تروحون بالطيارة؟
- لا بس سوريا اللي رحنا في طيارة.
@ انت ولد والا رجل؟
- لا .. انا دكتور.
@ عندك فلوس؟
- واجد عندي عطاني بابا وخشيتها.
@ ليش؟
- عشان ألعب في ملاهي الطائف.
@ طيب (السيكل) يودي لمكة.. يعني تروح عليه؟
- اذا ركبه واحد كبير زي مديركم يوصل مكة بسرعة.
@ طيب (وسومي) شكرا ومع السلامة؟
- ليه.. ما انت رايحة معنا مكة.
@ ما اقدر عندي شغل؟
- خلاص اكلم مديركم يوديك معنا.
@ طيب وش آخر كلمة تقولها؟
- انا احب (طيوفة) وبروح المدرسة وعندي سيكل ولا تنسون خل مديركم الكبير يعطيكم هدية من مكة.
