@ وش اسمك؟
- ندى خليفة الخليف.
@ وعمرك كم؟
- اربع بس.
@ اربع ايش.. ايام والا اسابيع.. والا سنين؟
- كلها مع بعض وساعات بعد.
@ كيف تعرفي معنى اسمك؟
- الحين لا! بس اكيد اذا دخلت المدرسة بعرف.
@ وش دخل المدرسة باسمك؟
- لان المدرسة تعلمني كيف اقرأ واكتب اسمي.
@ طيب انت الحين تدرسين؟
- بس الصبح اروح.. ابوي يوديني.
@ في أي صف؟
- ثالث.
@ طيب كيف بالصف الثالث وانت تقولين انك بعدين تروحين المدرسة؟
- ابوي اللي يوديني.
@ تعرفين وش لون شعرك؟
- شعري اصفر.
@ بس شعرك الحين لونه احمر؟
- هو يتلون كل يوم مرة احمر مرة اسود بس اليوم شفته اصفر.
- ندى تحبين بابا وماما؟
- ايه.. عشانهم يشترون لي العاب مرة حلوة.
@ زي ايش الالعاب؟
- دباديب وارانب من قطن زي اللي معاي.
@ وش اسم الدبدوب اللي بأيدك؟
- لا هذا ارنوب اخوي عزوزي.
@ طيب يصير تركبين على الارنوب زي الحصان؟
- لا مسكين بعدين يبكي هو صغير.
@ ليه هو الارنوب يتكلم؟
- ماما تقول يتكلم بس انا ما سمعه.
@ طيب وانت وش تقولين كيف يتكلم؟
- في الصباح يتكلم امريكي وبالليل مصري.
@ ليش يسوي كذا؟
- عشان انا شفته بمسلسل كرتون يتكلم مرة مصري ومرة امريكي.
@ ندى وين رحتوا بالعيد؟
- الملاهي بس زحمة والعابهم شوي مكسرة.
@ ايش رأيك بمديرة المدرسة؟
- دايما معصبة ما تعرف تضحك.
@ لما تكبرين تحبين تصيرين مديرة؟
- لا ابصير ارسم حناء.
@ ليش؟
- شوفيه حلو وهو مرسوم بيديني ابرسم للحريم وامي.
@ هذا تسمينه شغل؟
- يجيب فلوس واجد.
@ يصير الرجل يحط حناء؟
- الكبار بس.
@ تعرفين من هو الوزير؟
- رجل عمره مرة كبير.
