* يغني اغنية اغنيتين.. سمعوه حبوا صوته.. ركض على شركة انتاج (شك بوم) صار عنده البوم وبوسترات ودعايات لا ومعجبين بعد وآخرتها شنو؟؟ فيديو كليب وعلى صدره رقمه وكل من كلمة قال انا فنان صاعد انا فنان ناجح!! انت ناجح والله ناجح بس بالكليبات لانه المطلوب جذي محد يقدر يقولك فاشل (هذا هو الجزء المحروق من الفن).
* تدرس بمعهد موسيقي وتتفرغ لدراسة الآلات الموسيقية (يعني اذنها موسيقية بحته) وبمسيرتها اسماء كبيرة واغان حلوة, حبوها الناس وظلت من عشرين سنة على تواضعها واخلاقها وهيبتها لكن نسبة جمهورها تختلف لان محبيها وعشاق صوتها كل مالهم يزيدون..(هذا الجزء الخضر اللي ما يبين منه نسمة هالايام).
* الاول مدة صلاحية ماظنتي تتعدى السنتين.. اما الثانية فحب الناس لها فتح ابوبا كثيرة بعضها زاد مسؤوليتها وبعضها يساعدها بدون لا تحس ولا تدري انا اتكلم عن مواقع الفنانين على الانترنت.. اذا كنتوا من متصفحي (النت) اكيد شايفين هالمواقع طبعا وجود الموقع دليل على شعبية الفنان وبجذي صار له موقع (ترى الشغلة تكلف جهد وغيرو) المهم الموقع هاذا اكيد بيشمل اغاني المطرب واخباره وحتى صوره بكل المناسبات.. واكيد بعد بيكون له ادارة تشتغل عليه بس علشان يمثلونه ويمثلون جمهوره (انا اشوف انه المربين بها الشكل لازم يقدرون هالتعب ولو بالحروف يعني بالوساطة) وهاذي شغلة فيها ذوق وتقدير وشي يضحك انه هالشغلتين هم نفسهم اللي يتمناهم كل فنان وفنانه (الدنيا دواره).
همسة بأذن فنان
مثل ما انت تفرح بتكريمك جمهورك يتمنى منك لفته لهم على جهودهم وتعبهم صدقوني انا حاسة بها الاحساس عندي يقين انه الشخص اللي يحبك يمكن بتجاهلك يكرهك تبون الصج عاد انا شفت هالتقدير بفنان واحد بس اللي هو رابح صقر لمعجبيه لما صرح بلقائه في برنامج في فترة وقال عن جمهوره (هذول عيوني اللي اشوف فيهم).
* لا تطالعوني جذي ترى الحق ينقال انا ما اسمع له الا قليل وقليل جدا لكن بصراحة احترمه حيل على هالموقف والكلمتين اللي قالهم صج تبرد الخاطر.. هنيالكم يا عيون الصقر رابح.. انت فنان خلق وذوق جان زين في منك ثلاثين مو ملايين (ادري اطلب المستحيل).
* كلمة لكل فنان غرة نجاحه باغنيه واحصائيات الحضور بحفلاته وجم كلمة مغموسة بالمجاملة تغميس حب جمهورك ما يقدر بملايين.. خلوا الناس تذكركم بشي بموقف بكلمة.. مو اغني خلاص خلصت الشخابيط بس ابي اهني رابح صقر بجمهوره واهني جمهوره فيه لانهم علشانه وعلشانه بس مثلوه باحلى صورة وقدروا الله يعطيك ويعيطهم العافية.
شخبوطة
