أحتاج أشوفك يا حياتي ثواني
طلّي عليّ البعد مافيه مصلوح
انا حبيبي من بعادك اعاني
طوّل غيابك والوله جنن الروح
غاب الفرح من غيبتك والتهاني
وعزاي اسلى وامضي الوقت بالبوح
حرفي على الوجدان ماقد عصاني
مثل الحمام اللي يغنّي على الدوح
حبّك عثاء بالروح دمّر كياني
مع ذا تراني ارجع اقول مسموح
من الهجر البال يسهر يعاني
والهم من بعدك تفّتح له اجروح
جننتني ما عاد تظهر تباني
والشوق باين في عيوني و مفضوح
شفني غريب بديرتي ياحناني
امشي على درب الهوى وين ماتروح
اهوى جنابك واعشقك من زماني
حبك سما دنياي كالبدر له ضوح
يااجمل سنين العمر يا اغلى الاماني
ياوردي اللي بالفلا عاود يفوح
لك بالحنايا ياهنايا مكاني
ولك منزله بالروح يامنوة الروح
