نحيب الليل يلطم عتمته باسم القمر ناجاك
اعزي البدر في غرة صفر ولا يعزيني
تعيش الحزن في ذكرى المفارق يوم ثم عافاك
وانا اقضي كل ليله منتظر حزني يفاجيني
غفى طاري الفراق بعيني البارح على ذكراك
على آخر كل حلم بصورة الواقع يصحيني
تعال اعطيك من حزن احتري واخذ من اللي جاك
مقابل عينه من حزن بكره كيف توفيني
صدى صرخات فرحة يوم مندوب القدر ناداك
كثر خيره.. بدالك مر يستعرض يوريني
مليت إلك الخيال اشباه واشبعت اللغه باسماك
وهبتك كل سطر بكل صفحه من دواويني
تجي لك كل صوره في الخيال لعالم الادراك
والاعرج لان طرحه يعجبك حبيت واسيني
كثير اللي ضرار اعطوك باقة ورد فيها اشواك
تعمر ليلتين وتنجرح بالشوك وتجيني
وانا اجمع كل شوك الدرب واحرث وازرعه لخطاك
أمامك وانت تذكر كل خطوه في بساتيني
عديم ادراك واستاهل عبارتك: احتمل ماجاك
اجي ما بينك وبين القدر واعطيك سكيني
بدور والتمس لك عذر في اللي سوته يمناك
مسدد طعنتك للي وراي ووقعت فيني؟
أهيب بيوم في التاريخ قبل سنين يوم القاك
احسه لو دراى من جاب لي عود يواسيني
وداعتك الدموع ولا تكرر قول.. ويش ابكاك
وتطمن ما لدمعي لون في الباقي من سنيني
ترى اللون الحمر في دمعتي ماهو على فرقاك
تعكر لون دمعي يوم ذوب طيفك بعيني
