رسالة إلى القلب..

مجاراة جميلة لمجموعة من شاعرات الخليج: من عوّدك يا قلب يسمع مطالبك إلا غريبٍ ساقه الله تساخير إياك تشره او تعاتب قرايبك ما منهم اللي يرتكي للمقادير لين القسا ---------------- نفسك ليا احتاجت تبيّن معايبك الناس تعشق راعي المال والخير أول ما تكبر في زمانك مصايبك يتركك عمدٍ صاحبك نافخ الكير شواهق نجد ---------------- تجاربك لو الزمن حيل لا يبك لا بد فيها شي يحتاج تبرير ناسٍ تجيلك يوم تسمع طرايبك وناسٍ تجيك اليا بلتك التفاكير بروق بدوية ---------------- تضيق بك دنيا وتصغر رحايبك لامن خذلك اللي يسوق التباشير اللي بعينك مجلسه مثل شايبك ورّدك موتك ثم صب المعاذير بروق السراة ---------------- ان كان طيبة قلبك اللي تعذر بك مالك ومال مقوّلين الاساطير الله وهبك من النعم لين جانبك لاهل المكارم عند الاجواد تقدير عزيزة آل ثامر ---------------- لو كنت كاسر ما تسرك مخالبك ان كان ربي ما أذن بالتياسير وكان المدين بالوفا ما يطالبك تهون لو في لقمة العيش تقتير أسماء البراهيم ---------------- اذا نعيمك زاد كثرت حبايبك واذا فقدته عنك الناس بتسير كثر الفقد دايم يزيد بمتاعبك لانه المصالح أصبحت عندهم غير بشرى الحضرمي ---------------- الزم بحور الطيب تنشى سحايبك واحذر تجاذبها هبوب المعاصير هتان غيثك للرفيق وقرايبك مثل الحيا ينبت زهور ونواوير صمت الوايلية ---------------- من ابعدك يا قلب لو هو مصاحبك عده خساره ضمن كثر المخاسير يا قلب كانك عفت منهو متعبك دون غيابك عنه للكسر تجبير نورة السبيعي ---------------- قلبك عن أشياءٍ كثيرة يخاطبك من دافع الحكمة ومن باب تغيير والله هو اللي في ذنوبك يحاسبك والناس ما تضمن لك الشر والخير فتاة تهامة