ياصاحبي جر اللحن بالتباشير
يوم ٍ عسير والف يوم ٍ مسره
لا تشتكي ذا الوقت ويا المقادير
وخل الهموم الراكده مستقرّه
لا يلحظ اعدائك على الوجه تغيير
مهما لقى صدرك بكثر المضره
خلك على الدنيا حليم ٍ وصبير
ويذوق طعم الحلو من ذاق مره
ترى الليالي السود تبدي المحاذير
اللي يبدّل حزنها بالمسره
والعاقل اللي يدمح الشر بالخير
حلوه مشاريبه وراعي مبره
فزاع في يوم ٍ شديد المعاصير
اليا نصوه في حاجة ٍ حين غره
قرم ٍ سموح ٍ علمته المقادير
صنديد مايفضح مع الهم سِره
