ابدأ بذكر اللي كريمٍ رجيناه
العالم اللي يعلم السر والغيب
الواحد اللي نعبده نطلب رضاه
وعبادته ورضاه فوق المطاليب
من بعدها شعري ينوخ مطاياه
ويصافح اللي ساكنه بالمحاديب
سلام مثل الغيث والبرق يحداه
لبنت منهم يكثرون التراحيب
حقك علي يالغاليه ما جهلناه
فرضٍ علي يا بنت شيخ المواجيب
انتي محلك داخل القلب يزهاه
في حبكم ما نقبل الشك والريب
انتي الوفاء وام الصقور المغذّاه
ام الحرار اللي بروس المراقيب
وانتي جبين الخير وانتي محيّاه
والطيب ما جاء كون من منقع الطيب
هذي بيوتي يا منى الروح مهداه
من بيننا يا زين بعض الهناديب
هذا بعض ما كنه الصدر وابداه
واللي بقى باغلق عليه الدواليب
وختامها صلوا على من تبعناه
محمد اللي صانه الله من العيب
