يا بحر قد لي من أسبابك وفكري عايم
ماعرَفت أعيش وقتٍ زاد فيه عْتـابي
مبتعد عن زحمة العالم وجوي غايم
فاقدٍ نفسي قبل فقدي لـ أعز أقرابي
تحسبون أحلام وقتي مثل حلم النايم!
الطموح أكبر من اللي ما كتبه كْتابي
والزمن يفرد جناحه مثل طيرٍ حايم
شاب غيره بـ المواجه والزمن ماشابي
لا شكيت مْن الزمان الشين مالي لايم
كل يوم أراجع حْسابي وضاع حْسابي
بعت نص أصحابي البارح مع أول سايم
بعد ماشفت الحقيقه في عيون أصحابي
شمت عنهم والبلا لاصار قلبي شايم
عن ثيابٍ ما تشابه فـ اللبوس ثيابي
بين والله ماتقوم وعز قدر القايم
يختلف شكل النوايا في كنف ترحابي
آه ليت الوقت هايم مثل صدري هايم
كان باب الوصل من دونه ماقفل بابي
والهنوف اللي غلاي بـ صدرها متلايم
عانت أسباب المشاكل كلها بأسبابي
قالت أجري بانتظارك مثل أجر الصايم
هات عذرك قبل يصبح مثل ذنب إرهابي
قلت غايب.. وأدري مقصّر وعذري دايم
دامني حاضر بقلبك ما يهم غيابي
