الزمان اللي حداني على بعض الرخوم
أشكره شكرًا جزيلا على تجاربه
يوم جيت أبدي لهم حاجتي جاهم وجوم
كل منهم كن موته تمثنى غاربه
والله إنها هينه مير وصلت للنجوم
لين صارت من رداهم لها متقاربه
ومعرفة شبه الرجاجيل لا يمكن تدوم
في الرخا تصمد وعند الشدائد خاربه
ما يسرك فيهم اللي تحسب إنه جزوم
ولا يغرك منهم اللي يفتل شاربه
المراجل عندهم بالسوالف والعلوم
والفعايل عن طريق الهداني هاربه
ليه أجامل دامهم مايسدون اللزوم
يقدرون الطيب لكن يديهم تاربه
لعنبو رجل إلى من زهمته مايقوم
ولعنبو من لا نفع صاحبه وأقاربه
والزمان اللي حداني على بعض الرخوم
أحمد الله جل شانه صفت مشاربه
