الصاحب

يا شينها لا صرت منسي ومهجور
مالك رفيق غير هم وندامه
واليا سألت الوقت وش سبة الجور
عيا يجاوب وامتنع عن كلامه
الصاحب اللي بالوصل دوم مخبور
بدل طريقه وامتنع عن سلامه
مسكين يا قلب من الجور مقهور
والحظ الأقشر ما درينا علامه
لا هو على نسيان صاحبه مجبور
ما شاف منه غير عز وكرامه
يدري وانا ادري ما بدا بيننا قصور
عشنا وشفنا ما لحقنا ملامه
يا صاحبي إن عشت بالصد مقبور
حل بمحلك ليل يوحش ظلامه
وإن كنت في دنياك حي ومسرور
ترا رفيقك ضايع في حطامه
يا صاحبي الوقت ضيق ومحصور
والعمر يمضي ما عرفنا تمامه
حنا نتكبر والبلا تمضي شهور
والكل منا ما تحقق مرامه
واليوم انا بطلبك والفعل مقدور
جاوب رفيقك واحترم له مقامه
ترا الردي معطاك لو كان ميسور
اما يرده ذل والا رخامه