تراجعت الممثلة المصرية منى فاروق عن قرار الاعتزال، بعد ساعات من إعلانه، استمرارًا لحالة الجدل التي تثيرها كل فترة والتي تعدت كثيرًا عدد أعمالها الفنية.
وكتبت منى فاروق عبر صفحتها على إنستجرام منشورًا وضعت فيه إشارات إلى كل من د. أشرف زكي نقيب الممثلين المصريين، والفنان أشرف عبد الباقي.
قالت: "مساء الخير، الكلام اللي بقوله ده خارج خالص عن فكرة إني أخد التريند وأعمل زي أي حد، أنا قلت أعتزل الفن لسبب واحد وهو إن ده مصدر رزقي الوحيد اللي أنا بحبه وعايزة أشتغله، لكن لما أوصل لمرحلة إني مش عارفة أدفع إيجار بيتي حاجة تتعب".
منبوذة من كل الناس
أضافت الممثلة المصرية: "أنا محتاجة أشتغل عشان أقدر أعيش زي أي بني آدمة طبيعية، أنا غلطت وربنا بيسامح، ليه البني آدمين مش عايزين يسامحوا؟
أنا بسمع بودني بلاش منى عشان الفيلم ميضرش، ليه أنا بقيت منبوذة من كل الناس؟".
واستطردت: "أنا مش طالبة غير إني أشتغل في الحاجة اللي بحبها عشان أعرف أعيش، المجتمع حاططني في المكان الوحش بس مش يمكن عايزة أبقى كويسة زي أي واحدة؟ ليه بتقفلوا قدامي كل حاجة؟".
أبوس إيديكم عايزة أشتغل
تابعت منى فاروق: "عشان كدة، أنا بناشد دكتور أشرف زكي والأستاذ أشرف عبد الباقي وشركات الإنتاج، محتاجة الشغل عايزة أعرف أعيش، ولما قلت قرار أعتزل من أجل لو حد شافني بشتغل في محل لبس أو أي شغل ميقولش إيه ده؟ والله مش طالبة غير أشتغل، أبوس إيديكم عايزة أشتغل".
إجازة مفتوحة
كانت منى فاروق أعلنت قبل ساعات اعتزالها الفن، ومنحت نفسها إجازة مفتوحة سرعان ما تراجعت عنها.
وكتبت عبر حسابها إنستجرام: "تعبت وأشعر بعدم التقدير لشخصي ولموهبتي، ولم أعتد البقاء في مكان، ومع أشخاص لا تقدرني".
وتابعت: "إجازة مفتوحة من السوشيال ميديا مش هكون موجودة، مش عاوزة حاجة من حد ولا عايزة حد يعوز مني حاجة".
وأضافت: "أنا دلوقتي هعيش لنفسي محتاجة أكون نفسي محتاجة سلام نفسي اللي بيحبوني شكرًا، وكتر خیرکم، واللي ما بيحبنيش شيلوني من حساباتكم لحد ما أقدر أواجه الحياة الظالمة دي تاني".
جدل أكثر من الفن
المعروف أن منى فاروق تثير الجدل دائمًا سواء بمواقفها أو منشوراتها، أو ردودها على الجمهور الذي يتعمد استفزازها في البث المباشر الذي تجريه كل فترة.
ولم تعد –في الغالب- تستجيب للاستفزازات، وتردد دائمًا أنها لم تعد تنظر إلى الماضي، وأنها أدت مناسك العمرة، ونشرت بالفعل صور لها في المسجد الحرام وأمام الكعبة المشرفة.
